Komisioni Qendror i Zgjedhjeve rrëzoi të enjten akuzat e Partisë Demokratike për manipulim zgjedhor në Peqin, duke deklaruar se nuk janë gjetur fletë votimi të papërdorura jashtë administrimit zyrtar.
KQZ ka mohuar pretendimet e Partisë Demokratike për manipulim në Peqin me anë të “trenit bullgar”, një metodë ku përdoren fletë të plotësuara paraprakisht.
Në një përgjigje drejtuar koalicionit PD–Aleanca për Shqipërinë Madhështore, Komisioneri Ilirjan Celibashi tha se, pas verifikimeve, “nuk është evidentuar ndonjë rast ku fletë votimi të papërdorura të jenë administruar jashtë kutive të materialeve zgjedhore”.
PD pretendoi se kishte kapur fletë votimi në një lokal në Peqin, të përdorura nga PS për manipulim në zgjedhjet e 11 majit.
