Nga Zenel Çeliku
Mandati i katërt i Partisë Socialiste ka gjeneruar diskutime të shumta në panele televizive dhe në opinionin publik. Qeveria “Rama 4” nisi punën menjëherë pas zgjedhjeve parlamentare të vitit 2025. Duke qenë se ky është një mandat që pason një periudhë të gjatë në pushtet, pritshmëritë janë të larta, por edhe sfidat janë të shumta dhe komplekse.
Detyra kryesore e kësaj qeverie është përmirësimi i mirëqenies sociale dhe zhvillimi ekonomik i vendit. Rritja ekonomike përmes investimeve strategjike, mbështetja për sektorët prodhues, ulja e papunësisë – veçanërisht te të rinjtë – dhe frenimi i emigracionit janë prioritete jetike. Po ashtu, rritja e qëndrueshme e pagave dhe pensioneve është një tjetër angazhim që qytetarët e presin me kërkesë të lartë. Megjithëse raportohet për një rritje ekonomike prej 3–4%, shumica e qytetarëve thonë se nuk e ndjejnë këtë përmirësim në jetën e përditshme.
Ekonomia shqiptare përballet me sfida të tjera të mëdha, si inflacioni i lartë, presionet ndërkombëtare në tregjet e energjisë dhe borxhi publik ende në nivele të larta. Këto faktorë e bëjnë të domosdoshme një qeverisje aktive dhe të përgjegjshme për të realizuar premtimet e fushatës.
Një tjetër prioritet i kësaj maxhorance është reforma në drejtësi dhe lufta kundër korrupsionit e krimit të organizuar. Mbështetja e institucioneve të reja si SPAK dhe GJKKO është një premtim i bërë nga Kryeministri Rama, dhe qytetarët presin rezultate konkrete. Megjithatë, perceptimi publik për korrupsion të lartë dhe mungesë ndëshkueshmërie për zyrtarët e lartë mbetet një problem serioz. Transparenca dhe llogaridhënia në administratë kërkojnë angazhim të përhershëm.
Në fushën e arsimit dhe shëndetësisë ka ende shumë për të bërë. Cilësia e arsimit publik, digjitalizimi i sistemit arsimor dhe modernizimi i shërbimeve shëndetësore janë domosdoshmëri. Mungesa e infrastrukturës në zonat rurale, si dhe emigrimi i mjekëve, infermierëve dhe mësuesve jashtë vendit, janë shqetësime madhore që kërkojnë zgjidhje të menjëhershme.
Në aspektin ndërkombëtar, Shqipëria është nën presion të vazhdueshëm nga Bashkimi Evropian për të dhënë rezultate të matshme në luftën kundër korrupsionit dhe për të çuar përpara procesin e integrimit. Përparimi në negociatat për anëtarësim është përmendur nga zyrtarët europianë si pozitiv, duke lënë të hapur mundësinë që Shqipëria të përmbushë detyrat e saj brenda vitit 2027. Kapacitetet e administratës publike ekzistojnë, por kërkojnë koordinim dhe vullnet të qëndrueshëm politik për të finalizuar këtë fazë historike.
Në përfundim, “Rama 4” është një mandat kritik. Qeveria duhet të dëshmojë jo vetëm qëndrueshmëri politike, por edhe aftësi konkrete për të prodhuar rezultate reale. Mbajtja e besimit publik dhe përgatitja e vendit për një fazë të re zhvillimi dhe integrimi europian janë sfida madhore – por jo të paarritshme.
