Tiranë – Kryeministri Edi Rama ka uruar sot 34-vjetorin e themelimit të Partisë Socialiste, duke falënderuar mbështetësit për rezultatin e zgjedhjeve të 11 majit dhe duke e lidhur atë me aspiratën e Shqipërisë për anëtarësim në Bashkimin Europian.
Në një mesazh të publikuar në rrjetet sociale, zoti Rama ndau një fotografi të trëndafilit të kuq – simboli i PS-së – dhe shprehu mirënjohje për mbi 856 mijë qytetarë që, sipas tij, votuan për vizionin “Shqipëria 2030 në BE”.
Partia Socialiste e Shqipërisë u themelua më 12 qershor 1991. Ajo ka drejtuar vendin në disa periudha, përfshirë vitet 1997-2005 dhe nga viti 2013 deri më sot, duke qenë një nga formacionet politike më jetëgjata në pushtet në vend.
