Gjykata e Tiranës dënoi me burgim të përjetshëm Bledar Jambellin dhe Kristaq Leçin për përfshirjen në vrasjen e ish-drejtorit të Policisë së Vlorës, Artan Cuku, në prill 2017. Ngjarja ndodhi në rrugën e “Kosovarëve” në Tiranë dhe tronditi opinionin publik për shkak të profilit të lartë të viktimës.
Sipas vendimit gjyqësor, Bledar Jambelli rezultoi si porositës dhe financues i krimit. Ai u arrestua në Greqi në vitin 2018 dhe ekstradimi i tij u kërkua nga autoritetet shqiptare pas hetimeve që çuan në identifikimin e tij si urdhërues i atentatit.
Mikel Shallari, i cili kreu ekzekutimin, u arrestua pak ditë pas vrasjes. Ai bashkëpunoi me Prokurorinë, duke zbuluar emrat e personave të përfshirë në organizimin e atentatit. Në këmbim të bashkëpunimit, përfitoi statusin e bashkëpunëtorit të drejtësisë dhe u dënua me 10 vite burg.
Dosja hetimore tregon se motivi i vrasjes ishte një arrestim i vitit 2012, kur Artan Cuku, në cilësinë e drejtorit të Policisë së Vlorës, kishte ndaluar Jambellin si të dyshuar për vrasjen e shtetasit Armando Delaj. Pas dy vitesh, ai u lirua dhe për ditët në paraburgim përfitoi një dëmshpërblim financiar.
