Prishtinë – Në Gjykatën Themelore të Prishtinës vijon sot seanca gjyqësore për rastin “Banjska”, që lidhet me ngjarjet e 24 shtatorit 2023 në veri të Kosovës, ku mbeti i vrarë rreshteri i Policisë së Kosovës, Afrim Bunjaku.
Në seancën e djeshme dëshmoi zyrtari i Policisë Elez Peci, i cili tregoi momentet para dhe gjatë incidentit. Ai tha se rreth orës 02:30 të mëngjesit ishte njoftuar për vendosjen e dy kamionëve mbi një urë në fshatin Banjskë të komunës së Zveçanit, të cilët kishin bllokuar hyrjen në fshat.
Peci deklaroi se ishte në automjet me rreshterin Bunjaku kur u pajisën me mjete mbrojtëse për t’iu përgjigjur situatës. Sipas tij, rrethana e sigurisë ishte e rëndë dhe lëvizjet ishin të kufizuara për shkak të rrezikut.
Më pas dëshmoi edhe zyrtari tjetër i Policisë, Avni Shala, i cili përshkroi fuqinë e shpërthimit në afërsi të barrikadave. Ai tha se shpërthimi ishte aq i fuqishëm sa zbardhi rrugën në errësirë.
Procesi gjyqësor për këtë çështje të ndjeshme pritet të vazhdojë me dëshmitë e të tjerë pjesëtarëve të Policisë dhe dëshmitarëve të tjerë të ngjarjes.
