Bashkimi Evropian do të nisë zbatimin e Sistemit të Hyrje/Daljes (EES) më 12 tetor 2025, duke i dhënë fund praktikës së vendosjes së vulave në pasaportat e shtetasve nga vendet jo-anëtare të BE-së, përfshirë Ballkanin Perëndimor.
Sistemi do të funksionojë në 29 shtete të zonës Schengen dhe synon të regjistrojë hyrjet, daljet, qëndrimet e tejzgjatura dhe refuzimet në kohë reale. Ai do të mbledhë të dhëna personale dhe biometrike si fotografi dhe gjurmë gishtash.
Zbatimi do të bëhet me faza gjatë një periudhe gjashtëmujore, për të lejuar përshtatjen e autoriteteve dhe udhëtarëve. Shtetet anëtare duhet të kenë aktivizuar të paktën gjysmën e pikave kufitare pas tre muajsh dhe të gjitha deri në fund të periudhës.
Zyrtarët evropianë thonë se EES do të rrisë sigurinë dhe do të ndihmojë në parandalimin e hyrjeve të parregullta dhe abuzimeve me qëndrimet. Megjithatë, vendosja e sistemit ka shkaktuar shqetësime për vonesa të mundshme në kufi, veçanërisht në sezonin e lartë të udhëtimeve.
