Kryeministri Edi Rama ka sulmuar ashpër sot prokuroren Elsa Gjeli, për vendimin për mosnisjen e procedimit penal ndaj ndërtimeve të paligjshme në zonën e mbrojtur të Thethit. Ai e quajti vendimin “të llahtarshëm” dhe “tradhti ndaj interesit publik”, duke paralajmëruar veprime ndaj saj nga Ministria e Drejtësisë dhe Këshilli i Lartë i Prokurorisë.
Sipas Ramës, ndërtimi i një “fshati turistik pa leje” në zemër të Thethit përbën krim mjedisor dhe cënon rendin ligjor. Ai e cilësoi vendimin e prokurores si pjesë e një zinxhiri “vendimesh skandaloze” të prokurorëve që, sipas tij, po pengojnë mbrojtjen e pasurive publike.
Në reagim, Prokuroria e Shkodrës deklaroi se vendimi është marrë në përputhje me ligjin, duke theksuar se objektet në fjalë janë struktura të përkohshme pa themele dhe nuk përbëjnë ndërtim të paligjshëm sipas Kodit Penal. Ajo i cilësoi ndërhyrjet politike si të papranueshme dhe një cënim të ndarjes së pushteteve, të garantuar nga Kushtetuta.
Çështja pritet të tensionojë më tej marrëdhëniet mes ekzekutivit dhe sistemit të drejtësisë.
