Sekretarja e Përgjithshme e PDK-së, Vlora Çitaku, tha se zgjedhjet e reja parlamentare në Kosovë janë të pashmangshme dhe, sipas afateve kalendarike, mund të mbahen nga fundi i vitit. Ajo fajësoi kryeministrin në detyrë dhe kreun e LVV-së, Albin Kurti, për vonesat dhe për “konfrontim me aleatët” në vend të qeverisjes së përgjegjshme.
Tetë muaj pas zgjedhjeve të 9 shkurtit, Kosova vijon pa qeveri të re. Më 5 shtator, Gjykata Kushtetuese vendosi masë të përkohshme deri më 30 shtator, duke ndaluar çdo procedurë për formimin e kabinetit, pas ankesës së Listës Serbe mbi votimin për nënkryetarin serb të Kuvendit.
Kurti e kritikoi ashpër vendimin, duke e quajtur Kushtetuesen “hije politike” të opozitës. Në të njëjtën klimë përplasjesh, Shtetet e Bashkuara pezulluan pa afat Dialogun Strategjik me Kosovën, duke shprehur shqetësime për veprimet e qeverisë në detyrë.
Çitaku apeloi që t’i jepet fund qasjes “destruktive” dhe vendi të kthehet te agjenda euroatlantike: “Nëse duam NATO-n dhe BE-në, duhet të marrim vendimin e duhur.”
