Shtetet e Bashkuara kanë pezulluar pa afat dialogun strategjik me Kosovën, duke shprehur shqetësim për veprimet e Qeverisë në detyrë që, sipas tyre, kanë rritur tensionet dhe paqëndrueshmërinë. Ambasada amerikane në Prishtinë tha se kjo situatë ka kufizuar aftësinë për të punuar në mënyrë produktive me Kosovën mbi prioritetet e përbashkëta.
Dialogu strategjik ishte planifikuar të zhvillohej këtë vit dhe synonte forcimin e marrëdhënieve ekonomike e diplomatike. Sipas ambasadës, veprimet dhe deklaratat e fundit të kryeministrit në detyrë, Albin Kurti, kanë vënë në pikëpyetje progresin e arritur, duke detyruar pezullimin e procesit.
Presidentja Vjosa Osmani kishte njoftuar në janar marrëveshjen për fillimin e dialogut strategjik, që parashikon diskutime të nivelit të lartë mbi mbrojtjen, sigurinë, energjinë dhe bashkëpunimin ekonomik. SHBA-ja la të hapur mundësinë e rikthimit në tryezë “kur kushtet të jenë të përshtatshme”.
