Kuvendi miratoi sot me 77 vota pro dhe 36 kundër projektligjin “Për barazinë gjinore”, pas një seance të tensionuar dhe protestash jashtë parlamentit që e akuzuan nismën si “antifamiljare”.
Ligji përcakton “gjininë” si role dhe sjellje të ndërtuara në kontekstin social, formulim që zëvendëson versionin e mëparshëm ku përkufizohej si “gjithëpërfshirëse”. Qeveria e ka paraqitur nismën si pjesë të përafrimit me legjislacionin e Bashkimit Europian.
Kryeministri Edi Rama e mbrojti ligjin si “shumë fisnik dhe në përputhje të plotë me parimet e BE-së për barazinë gjinore dhe mosdiskriminimin”, ndërsa opozita, e udhëhequr nga Sali Berisha, e quajti “projekt për shkatërrimin e familjes shqiptare”.
Gjatë ditës, dhjetëra qytetarë dhe përfaqësues të shoqërisë civile protestuan para Kuvendit me pankarta kundër ligjit, ndërsa deputetët socialistë e mbrojtën si “hap drejt standardeve europiane të të drejtave të njeriut”.
Në të njëjtën seancë, Kuvendi rrëzoi kërkesën e Partisë Demokratike për ngritjen e një komisioni hetimor për shkarkimin e Presidentit Bajram Begaj.
