Shqipëria dhe Italia do të zhvillojnë më 13 nëntor në Romë mbledhjen e parë të përbashkët të dy qeverive, një takim që shënon një etapë të re në partneritetin strategjik mes dy vendeve.
Kryeministri Edi Rama dhe homologja italiane Giorgia Meloni do të nënshkruajnë në Villa Pamphili një marrëveshje gjithëpërfshirëse që mbulon fusha si energjia, mbrojtja, shëndetësia, arsimi, inovacioni, mjedisi dhe migracioni.
Në fushën e energjisë, marrëveshja do të bazohet në bashkëpunimin trepalësh Itali–Emiratet e Bashkuara–Shqipëri për prodhimin e energjisë së rinovueshme dhe ndërtimin e një linje nëndetëse që do të lidhë sistemet energjetike të dy vendeve.
Palët pritet gjithashtu të bien dakord për forcimin e patrullimeve detare dhe krijimin e një Sistemi të Mbrojtjes Civile në Shqipëri me mbështetje italiane. Italia do të ofrojë asistencë teknike edhe për ngritjen e Bankës Shqiptare të Zhvillimit dhe qendrës “ExpoAlbania” në Tiranë.
Në përfundim, Roma do të riafirmojë mbështetjen për anëtarësimin e Shqipërisë në Bashkimin Evropian.
