Drejtoria e Doganave ka bllokuar aktivitetin e “Bankers Petroleum” në Patos-Marinëz, për shkak të një gjobe prej 120 milionë eurosh të vendosur në vitin 2019, pasi kompania akuzohet se nuk ka paguar 30 milionë euro akcizë për holluesin e naftës.
Kompania kundërshton vendimin, duke deklaruar se për këtë produkt nuk aplikohet akcizë sepse nuk ka konsum në territorin shqiptar dhe se çështja është ende në proces gjyqësor. “Bankers” njoftoi se ka depozituar kallëzim penal në SPAK kundër funksionarëve përgjegjës dhe e cilësoi bllokimin “arbitrar” dhe me pasoja të rënda operacionale.
Sipas kompanisë dhe AKBN-së, ndërprerja e nxjerrjes rrezikon dëmtim të pakthyeshëm të fushës së naftës, si dhe vendet e punës për mijëra punonjës dhe nënkontraktorë. Dogana nuk ka komentuar më tej mbi zhvillimin.
