Kreu i Partisë Demokratike, Sali Berisha, zhvilloi turin e “Foltores” në Lezhë, ku u shënua edhe 35-vjetori i themelimit të degës lokale të PD-së.
Gjatë fjalës së tij, Berisha vlerësoi rolin e PD-së në rrëzimin e komunizmit dhe vendosjen e pluralizmit politik, duke e cilësuar partinë si themel të demokracisë në Shqipëri.
Ai e përdori përvjetorin për të dhënë një mesazh të fortë opozitar, duke u bërë thirrje qytetarëve për mobilizim dhe protesta kundër qeverisë aktuale. Sipas Berishës, opozita duhet të reagojë në sheshe dhe jo vetëm përmes rrjeteve sociale.
Berisha theksoi se PD do të vazhdojë aksionin opozitar me mjete demokratike, duke e cilësuar protestën si rrugën kryesore përballë një pushteti që, sipas tij, ka humbur legjitimitetin.
