Greva e fermerëve në Greqi po shkakton vështirësi serioze në kalimet kufitare me Bullgarinë, njoftoi të martën Policia Kufitare Bullgare. Automjetet e pasagjerëve po përballen me vonesa për shkak të bllokimeve të rrugëve në territorin grek.
Fermerët, që protestojnë prej më shumë se dy muajsh për financimet nga fondet e BE-së, i kanë dhënë qeverisë greke afat deri të mërkurën për t’iu përgjigjur kërkesave të tyre. Ata kanë paralajmëruar se të enjten dhe të premten mund të bllokojnë plotësisht të gjitha pikat kufitare. Qeveria greke ka bërë thirrje për dialog, duke sinjalizuar gatishmëri për të diskutuar kërkesa që mund të përmbushen.
