Qeveria, bankat dhe sipërmarrja nënshkruan programin “Dyfisho Sipërmarrjen Tënde”, që synon t’u japë më shumë akses në kredi ndërmarrjeve të vogla dhe të mesme.
Programi u nënshkrua sot, më 13 maj, dhe do të mbështetet fillimisht nga një linjë kredie prej 250 milionë eurosh nga Banka Europiane.
Sipas ministrit të Financave, Petrit Malaj, ndërmarrjet e vogla dhe të mesme përbëjnë 99% të bizneseve në Shqipëri dhe punësojnë 82% të fuqisë punëtore.
Malaj tha se këto ndërmarrje sigurojnë rreth 75% të investimeve në ekonomi dhe 78% të vlerës së shtuar.
Programi synon të lehtësojë financimin për bizneset që kanë nevojë për investime, sidomos në sektorë të nënfinancuar.
Sipas qeverisë, mbështetja do të shkojë për rritjen e kapaciteteve, digjitalizimin, efiçencën e energjisë dhe fusha të tjera që rrisin konkurrueshmërinë e bizneseve.
Linja e kredisë do të shoqërohet me një garanci sovrane prej 30 milionë eurosh, e cila pritet të rritet në varësi të kërkesës dhe mundësive buxhetore.
Kryeministri Edi Rama tha se ndërmarrjet e vogla dhe të mesme janë motori i ekonomisë, por shumë prej tyre kanë pasur vështirësi për të marrë kredi tregtare.
Sipas Ramës, programi do të ofrojë kredi me interes nga 2% deri në 3%, ndërsa garancia sovrane do të mbulojë nga 30% deri në 70% të riskut, sipas nivelit të vlerësuar.
Ai u bëri thirrje bankave të jenë më të guximshme në financimin e bizneseve, sidomos në bujqësi.
Rreth autorit
