Perimet u shtrenjtuan me 8.5% në qershor, edhe pse kjo është periudha kur prodhimi vendas duhet të jetë më i bollshëm dhe çmimet më të ulëta.
Sipas INSTAT-it, grupi “perime, zarzavate dhe bishtajore” pati një nga rritjet më të forta mes ushqimeve.
Rritja ishte gati tri herë më e lartë se inflacioni mesatar i ushqimeve, që ishte 3%.
Normalisht, qershori sjell më shumë prodhim në treg. Këtë vit, çmimet lëvizën në kah të kundërt.
Shtrenjtimi lidhet me kostot më të larta të prodhimit dhe transportit, kërkesën nga turizmi dhe orientimin e një pjese të prodhimit drejt eksporteve.
Në verë rritet konsumi nga hotelet, restorantet dhe njësitë e shërbimit, sidomos në zonat bregdetare.
Kjo shton presionin mbi tregun vendas.
Një pjesë e prodhimit shkon edhe për eksport, kur jashtë ofrohen çmime më të mira.
Mes ushqimeve, rritjen më të lartë e patën peshku dhe produktet e detit, me 9%.
Perimet renditen menjëherë pas tyre, me 8.5%.
Mishi u shtrenjtua me 4.2%, ndërsa qumështi, bulmeti dhe vezët me 2.4%.
Frutat ishin i vetmi grup me ulje, me 2.8% krahasuar me një vit më parë.
Të dhënat tregojnë se presioni mbi buxhetet familjare po vjen nga produktet bazë, përfshirë edhe ato që duhet të ishin më të lira gjatë sezonit.
About the Author
