Dhomat e Specializuara të Kosovës në Hagë shpallin sot aktgjykimin në procesin ndaj Hashim Thaçit, Kadri Veselit, Rexhep Selimit dhe Jakup Krasniqit. Seanca nis në orën 10:00 dhe do të transmetohet publikisht në shqip, anglisht dhe serbisht.
Katër ish-krerët e UÇK-së akuzohen për krime kundër njerëzimit dhe krime lufte, përfshirë përndjekje, burgim, torturë, vrasje dhe zhdukje me forcë. Të katërt janë deklaruar të pafajshëm.
Gjyqi nisi në prill 2023. Gjatë procesit dëshmuan 134 persona në sallë: 125 të thirrur nga Prokuroria, dy nga përfaqësuesit e viktimave dhe shtatë nga mbrojtja. Procedura e provave u mbyll në dhjetor 2025.
Prokuroria ka kërkuar dënime me nga 45 vjet burg për të akuzuarit, ndërsa mbrojtja ka kërkuar pafajësinë e tyre.
Në Kosovë, vendimi është paraprirë nga tubime në mbështetje të ish-krerëve të UÇK-së, ndërsa në Hagë janë marrë masa shtesë sigurie. Vendimi i sotëm është i shkallës së parë dhe mund të apelohet.
Rreth autorit
