Çmimi i naftës në Kosovë po i afrohet pragut prej 2 eurosh për litër, pas një rritjeje të fortë që brenda pak javësh ka shtuar më shumë se 20 centë në pompë.
Të enjten, një litër naftë u shit në pika të ndryshme nga 1.92 deri në 1.97 euro, duke arritur nivelin më të lartë të vitit. Shoqata e Naftëtarëve paralajmëroi se çmimi mund të kalojë 2 euro nëse vazhdon përshkallëzimi i konfliktit në Lindjen e Mesme dhe presioni mbi tregjet ndërkombëtare të energjisë.
Rritja vjen vetëm pak javë pasi Ministria e Industrisë, Ndërmarrësisë, Tregtisë dhe Inovacionit hoqi çmimin maksimal të derivateve dhe ua la kompanive përcaktimin e çmimeve sipas kostos së importit dhe tregut.
Më 3 shtator, kur çmimi tavan ishte ende në fuqi, nafta shitej deri në 1.72 euro për litër. Që prej heqjes së tij, diferenca ka kaluar 20 centë.
Megjithatë, ministria thotë se inspektimet nuk kanë gjetur deri tani abuzim nga tregtarët. Sipas të dhënave të saj, çmimi i importit të naftës gjatë 24 orëve të fundit ishte 1.83 euro për litër, ndërsa shitja me pakicë lëvizte kryesisht nga 1.92 deri në 1.94 euro.
Qeveria ka lënë të hapur mundësinë e rikthimit të çmimit tavan nëse konstatohet abuzim ose rritje e pajustifikuar e marzhave të fitimit.
Për konsumatorët, ndërkohë, pragu prej 2 eurosh është tashmë shumë pranë.
Rreth autorit
