Shqipëria hyn sot në një klub që deri pak vite më parë do të dukej larg axhendës së saj diplomatike: vendet që kanë rënë dakord për rregullat e përbashkëta të eksplorimit të Hënës, Marsit dhe hapësirës.
NASA njoftoi se Shqipëria do të nënshkruajë të hënën Marrëveshjet Artemis në një ceremoni në selinë e agjencisë amerikane në Uashington. Me firmën e saj, Shqipëria bëhet vendi i 73-të që i bashkohet marrëveshjes.
Ceremonia është parashikuar për në orën 12:00 të Uashingtonit. Shqipërinë do ta përfaqësojnë ministri për Evropën dhe Punët e Jashtme Ferit Hoxha dhe ambasadori në Shtetet e Bashkuara Ervin Bushati.
Marrëveshja nuk do të thotë se Shqipëria po nis një program për të dërguar astronautë në Hënë.
Artemis Accords janë një grup parimesh të hartuara nga Shtetet e Bashkuara dhe partnerët e tyre për mënyrën se si shtetet duhet të sillen gjatë eksplorimit civil të hapësirës.
Ato përfshijnë përdorimin paqësor të hapësirës, transparencën, ndihmën për astronautët në raste emergjente, ndarjen e të dhënave shkencore dhe shmangien e ndërhyrjes në aktivitetet e vendeve të tjera.
Marrëveshjet u krijuan në vitin 2020 nga SHBA-ja dhe shtatë vende të tjera, ndërsa numri i nënshkruesve është zgjeruar shpejt vitet e fundit.
Për Shqipërinë, firma është kryesisht një hap diplomatik dhe shkencor, por e vendos vendin brenda kornizës së bashkëpunimit që po ndërtohet për aktivitetet e ardhshme në Hënë dhe më tej.
Rreth autorit
