Kosova ka më pak se një javë për të zgjedhur presidentin e ri.
Gjykata Kushtetuese ka publikuar aktgjykimin e plotë dhe ka konfirmuar se afati 60-ditor për zgjedhjen e presidentit mbaron më 6 tetor.
Nëse Kuvendi nuk zgjedh president deri në atë datë, ai shpërndahet dhe vendi shkon në zgjedhje të reja parlamentare. Zgjedhjet duhet të zhvillohen brenda 45 ditëve.
Për votimin e presidentit duhet të jenë të pranishëm të paktën 80 nga 120 deputetët. Në dy raundet e para kërkohet shumicë prej dy të tretash, ndërsa në raundin e tretë mjafton shumica e deputetëve, por kuorumi prej 80 deputetësh mbetet i nevojshëm.
Kosova ka mbetur pa president të zgjedhur që prej përfundimit të mandatit të Vjosa Osmanit. Kryetarja e Kuvendit, Albulena Haxhiu, po ushtron përkohësisht detyrën.
Partitë duhet tani të gjejnë një kandidat dhe votat e nevojshme brenda 6 tetorit.
Rreth autorit
