PRISHTINË, 30 tetor — Kuvendi i Kosovës themeloi një komision hetimor parlamentar për të shqyrtuar veprimet dhe mosveprimet e institucioneve në rastin e vrasjes së Arlinda Zekajt, si dhe trajtimin e dhunës ndaj grave dhe fëmijëve në familje. Vendimi u miratua me 90 vota për.
Komisioni do të ketë 11 anëtarë dhe mandat deri në gjashtë muaj. Kryesues është zgjedhur Burim Ramadani nga Aleanca për Ardhmërinë e Kosovës, ndërsa zëvendëskryesues Adnan Rrustemi nga Lëvizja Vetëvendosje.
Mandati përfshin shqyrtimin e mënyrës se si institucionet përmbushën detyrimet për mbrojtjen e jetës dhe sigurisë së Zekajt, si dhe zbatimin e ligjeve për parandalimin dhe trajtimin e dhunës në familje. Gjatë debatit, deputetë kërkuan përgjegjësi dhe llogaridhënie institucionale.
Ministrja e Drejtësisë, Donika Gërvalla, tha se është e gatshme të bashkëpunojë me komisionin dhe të japë përgjigjet e nevojshme. Kuvendi kërkon që komisioni ta përfundojë punën dhe t’ia paraqesë raportin brenda afatit të përcaktuar.
Burimi: Kuvendi i Kosovës.
Rreth autorit
