Këshilli Bashkiak i Tiranës votoi për shkarkimin e kryebashkiakut Erion Veliaj, në paraburgim që nga data 10 shkurt 2025. Vendimi është propozim zyrtar: i dërgohet Prefektit, më pas Qeverisë; certifikimin e bën Këshilli i Ministrave.
Seanca u shoqërua me përplasje. Kryetarja Megi Fino tha se qytetit i duhet drejtues dhe e quajti vendimin “detyrim politik e moral”. PS-ja theksoi se “gjyqin e bën drejtësia”. PD akuzoi shumicën se i mohoi Veliajt praninë në mbledhje dhe kërkoi ta dëgjonte edhe si të pandehur.
Endrit Braimllari (PS) propozoi bashkimin e tre kërkesave për shkarkim në një akt të vetëm “për interes qytetar”. Opozitari Genc Gjokutaj tha se vota e PS bëhet “me urdhra politikë”, ndërsa e opozitës “për qytetarët”.
Veliaj, me anë të një letre nga burgu, kërkoi që prania e tij të hidhej në votim. Sekretari i Këshillit, Behar Zeneli, sqaroi se nuk ka vendim që e ndalon të jetë i pranishëm, por mund të dërgojë shënime me shkrim; ekipi ligjor nuk ka kërkuar leje-dalje pranë autoriteteve të burgut.
