Në javën e parë të Programit Kombëtar të Depistimit të Kancerit të Gjirit janë kryer 779 mamografi falas në të gjithë vendin. Lajmin e bëri të ditur kryeministri Edi Rama, ndërsa ministrja e Shëndetësisë, Evis Sala, vizitoi njësinë lëvizëse të vendosur në sheshin “Nënë Tereza”, në kuadër të Tetorit Rozë.
Aktualisht funksionojnë 16 aparatura stacionare dhe 2 njësi të lëvizshme që ofrojnë mamografi falas për gratë mbi 40 vjeç, pa nevojë për sistem referimi. Shërbimi është i disponueshëm gjatë gjithë vitit në spitalet dhe poliklinikat e vendit, si dhe në zonat e largëta përmes njësive të lëvizshme.
Ministrja Sala theksoi rëndësinë e depistimit të hershëm për diagnostikimin dhe trajtimin me sukses të kancerit të gjirit, ndërsa programi kombëtar mbështetet nga Instituti i Shëndetit Publik dhe njësitë vendore të kujdesit shëndetësor.
