Platforma ndërkombëtare Google ka fshirë zyrtarisht mbi 10,000 vlerësime fiktive me 1 yll nga profilet e hoteleve, resorteve dhe restoranteve në Shqipëri, duke u rikthyer bizneseve notat origjinale pas një fushate agresive digjitale.
Operacioni i stilit “review bombing” u ekzekutua brenda pak ditëve nga një rrjet llogarish të rreme, të cilat vepruan në mënyrë të sinkronizuar për të dëmtuar reputacionin e sipërmarrjeve të turizmit në Google Maps gjatë kulmit të sezonit. Si pasojë e kësaj ndërhyrjeje, vlerësimet mesatare të shumë strukturave mikpritëse ranë në mënyrë drastike nga 4.7 në 2.4 yje.
Pas raportimeve zyrtare dhe verifikimit të aktivitetit si shkelje e politikave mbi recensionet reale, ekipet e sigurisë së Google fshinë në bllok komentet abuzive dhe vendosën në listën e zezë llogaritë e përfshira, duke normalizuar prezencën online të bizneseve të prekura.
Sektori i Hetimit të Krimit Kibernetik pranë Policisë së Shtetit ka nisur procedurat verifikuese për identifikimin e rrjetit që organizoi sulmin. Autoritetet shtetërore e cilësuan fushatën si cenim të paligjshëm të konkurrencës dhe dëmtim të qëllimshëm të ekonomisë kombëtare.
Rreth autorit
