Kuvendi mbylli të enjten një nga seancat më të gjata të javëve të fundit, duke kaluar nga debatet për drejtësinë te ndryshimet në qeveri dhe një seri marrëveshjesh ndërkombëtare.
Në qendër të vëmendjes ishte ligji për statusin e gjyqtarëve dhe prokurorëve, i lidhur drejtpërdrejt me pagat e magjistratëve. Çështja kishte prodhuar përplasje të forta ditët e fundit, por shumica parlamentare e kaloi nismën e deputetëve Aulona Bylykbashi dhe Admir Kadeli me 84 vota pro, 24 kundër dhe 1 abstenim.
Votimi i dha fund, të paktën në Kuvend, një debati që kishte vënë përballë politikën dhe institucionet e drejtësisë për formulën e pagave.
Por seanca nuk u mbyll me kaq.
Deputetët votuan edhe ndryshimin në krye të Ministrisë së Brendshme. Besfort Lamallari u shkarkua me 83 vota pro dhe Ervin Demo mori drejtimin e dikasterit me të njëjtin numër votash. Në të njëjtën kohë, Demo u lirua nga posti i ministrit të Shtetit për Pushtetin Vendor.
Seanca kishte nisur me një deklaratë të përbashkët të të gjitha grupeve parlamentare për aktgjykimin e Dhomave të Specializuara të Kosovës në Hagë ndaj Hashim Thaçit, Kadri Veselit, Rexhep Selimit dhe Jakup Krasniqit.
Më pas, Kuvendi kaloi në një axhendë të ngjeshur votimesh.
Me 102 vota pro u ratifikua Konventa për Themelimin e Komisionit Ndërkombëtar të Kërkesave për Ukrainën, ndërsa me 107 vota u miratua Konventa kuadër e Këshillit të Evropës për Inteligjencën Artificiale, të Drejtat e Njeriut, Demokracinë dhe Shtetin e së Drejtës.
Po me 107 vota kaluan ndryshimet në marrëveshjen ndërkombëtare për vajin e ullirit dhe ullinjtë e tavolinës.
Deputetët miratuan gjithashtu ndryshime në drejtimin dhe përbërjen e komisioneve të përhershme parlamentare, ndërsa dy projektligje të tjera mbetën për seancën e ardhshme.
Pas një dite debatesh, interpelancash dhe votimesh, Kuvendi e mbylli seancën me dy vendime që dominuan politikisht ditën: formulën e re të pagave të magjistratëve dhe ndryshimin në krye të Ministrisë së Brendshme.
Rreth autorit
