Të kesh një foshnjë në Shqipëri nuk është shtrenjtë vetëm për xhepin e një familjeje shqiptare. Në raport me pagat, kostoja del ndër më të lartat në Europë.
Një përllogaritje e kompanisë së transfertave financiare Remitly, e publikuar nga Euronews dhe referuar nga Monitor, vlerëson se produktet bazë për vitin e parë të jetës së një fëmije kushtojnë rreth 5,532 euro në Shqipëri.
Kjo shumë përfaqëson rreth 66% të pagës mesatare vjetore.
Në krahasimin me vendet europiane të analizuara, vetëm Moldavia ka një barrë më të lartë në raport me të ardhurat, me 88.8%. Mesatarja europiane e studimit është vetëm 20.9%.
Dallimi bëhet edhe më i fortë kur Shqipëria krahasohet me vendet me paga më të larta. Në Zvicër, të njëjtat kategori shpenzimesh përbëjnë rreth 8% të pagës mesatare vjetore, ndërsa në Holandë 9.4%.
Edhe në vlerë absolute, Shqipëria del lart në renditje: me 5,532 euro, është e nënta më e shtrenjtë mes 38 vendeve europiane të përfshira në krahasim.
Shifra nuk përfaqëson të gjithë koston reale të rritjes së një fëmije dhe nuk është statistikë zyrtare shqiptare. Por krahasimi nxjerr në pah problemin kryesor: çmimet e produkteve për foshnjat janë të larta përballë nivelit të të ardhurave të familjeve shqiptare.
Rreth autorit
