Puna e shqiptarëve jashtë vendit po sjell më shumë para se kurrë në ekonominë e Shqipërisë.
Të ardhurat neto nga puna jashtë arritën në 397 milionë euro gjatë gjashtë muajve të parë të vitit, një rritje prej 27% krahasuar me të njëjtën periudhë të vitit 2025 dhe niveli më i lartë historik për këtë periudhë.
Në këtë kategori përfshihen kryesisht punonjësit sezonalë, ata që punojnë jashtë për më pak se një vit dhe punëtorët ndërkufitarë që vazhdojnë ta kenë qendrën e interesave ekonomike në Shqipëri.
Por kjo është vetëm gjysma e tablosë.
Në të njëjtën periudhë, remitancat e emigrantëve arritën në 621 milionë euro, 16.7% më shumë se një vit më parë. Edhe ato shënuan rekord për gjashtëmujorin.
Të marra së bashku, të ardhurat nga puna dhe remitancat sollën 1 miliard e 18 milionë euro, 20.6% më shumë se një vit më parë.
Shifra është e rëndësishme edhe për një arsye tjetër: këto para mbuluan rreth 35% të deficitit tregtar të mallrave të Shqipërisë gjatë gjashtëmujorit.
Pas rekordit qëndron megjithatë një realitet i dyfishtë: ekonomia përfiton gjithnjë e më shumë nga paratë e fituara jashtë vendit, ndërsa një pjesë e madhe e fuqisë punëtore vazhdon ta kërkojë punën përtej kufirit.
Rreth autorit
