Protestat kundër dënimit të ish-krerëve të UÇK-së kalojnë sot nga tubimet e mbrëmjes te studentët.
Parlamenti Studentor i Universitetit të Prishtinës, së bashku me studentë nga universitete të tjera publike dhe private, ka thirrur një marshim paqësor për të kundërshtuar vendimin e Gjykatës Speciale në Hagë.
Marshimi pritet të nisë në orën 11:30 nga Qendra e Studentëve dhe të vazhdojë drejt sheshit “Skënderbeu”. Në mesditë janë parashikuar edhe fjalime nga përfaqësues të studentëve.
Organizatorët kanë kërkuar unitet dhe drejtësi, ndërsa kanë bërë thirrje që tubimi të jetë paqësor.
Marshimi vjen pas pesë netësh radhazi protestash në Prishtinë kundër vendimit të Speciales. Të dielën në mbrëmje, protestuesit hapën në shesh një flamur të madh kombëtar me emblemën e UÇK-së.
Gjykata i shpalli fajtorë më 16 shtator Hashim Thaçin, Kadri Veselin, Jakup Krasniqin dhe Rexhep Selimin. Thaçi dhe Krasniqi u dënuan me nga 25 vjet burgim, Veseli me 18 dhe Selimi me 13 vjet.
Protesta e sotme pritet të tregojë nëse kundërshtimi ndaj vendimit do të zgjerohet përtej organizatave të veteranëve dhe tubimeve spontane të ditëve të fundit.
Rreth autorit
