Shqipëria po tërheq gjithnjë e më shumë turistë drejt maleve, lumenjve, liqeneve dhe parqeve kombëtare, ndërsa turizmi i natyrës po zë një pjesë më të madhe të ofertës turistike të vendit. Sipas Travel and Tour Word, vendi po shfaqet gjatë vitit 2026 si një nga destinacionet europiane me rritje të shpejtë në këtë segment.
Në veri, Thethi dhe Valbona mbeten ndër destinacionet kryesore. Shkodra shërben si pikë hyrëse drejt Alpeve Shqiptare, ndërsa itinerari Valbonë–Theth është bërë një nga rrugët më të njohura për turistët që kërkojnë ecje dhe aventura në mal.
Në jug, Vjosa dhe Përmeti po tërheqin vizitorë për rafting, kajak, ecje dhe burime termale. Edhe Vlora, Himara dhe Saranda po përfitojnë nga kombinimi i detit me malet dhe zonat e mbrojtura.
Rritja po shtrihet edhe në Korçë dhe Pogradec, ku turizmi malor dhe liqenor mund të sjellë vizitorë edhe jashtë sezonit të verës. Kjo e shpërndan aktivitetin turistik përtej bregdetit dhe në më shumë zona të vendit.
Sfida mbetet mbrojtja e zonave natyrore përballë rritjes së numrit të vizitorëve. Sipas materialit, e ardhmja e këtij modeli turizmi do të varet nga infrastruktura, menaxhimi i flukseve dhe ruajtja e pyjeve, lumenjve dhe ekosistemeve malore.
Rreth autorit
