Java e pestë e Superiores solli pesë ndeshje, por spektakli më i madh erdhi në Tiranë, ku bardheblutë u detyruan të ndjekin dy herë Elbasanin për të shpëtuar një pikë.
Ndeshja përfundoi 2-2 dhe kishte thuajse gjithçka: katër gola, përmbysje të pjesshme dhe një shtyllë që i mohoi Redon Xhixhës tripletën.
Elbasani kaloi i pari në avantazh në minutën e 23-të, kur ndërhyrja e Ndong përfundoi në portën e Tiranës. Vetëm shtatë minuta më vonë, Xhixha barazoi me kokë pas krosimit të Kish.
Miqtë goditën sërish para pushimit. Mazari shmangu pozicionin jashtë loje, kaloi portierin Bekaj dhe shënoi për 2-1 në minutën e 37-të.
Por Xhixha kishte ende punë për të bërë.
Në minutën e 54-t, sulmuesi shënoi golin e dytë personal dhe riktheu baraspeshën. Në të 78-ën ai iu afrua edhe tripletës, por goditja e tij u ndal nga shtylla. Ndeshja u luajt pa tifozë për shkak të një gjobe të pashlyer në kohë nga Tirana.
Ndërkohë, Teuta vazhdoi nisjen e fortë të sezonit duke fituar 2-0 ndaj Vllaznisë në “Loro Boriçi”. Durrsakët mbyllën javën në krye me 13 pikë.
Dinamo City regjistroi fitoren e katërt radhazi, 3-1 ndaj Laçit. Lorran, Lorenco Vila dhe Ruci shënuan për kryeqytetasit, ndërsa Gamarra realizoi golin e vetëm të Laçit.
Egnatia u kthye te fitorja duke mundur Partizanin 2-1. Loukili dhe Albanese i dhanë vendasve epërsinë 2-0, ndërsa Valentino Murataj shkurtoi diferencën dy minuta pas golit të dytë.
Vora dhe Skënderbeu barazuan 1-1.
Rezultatet e javës së pestë
Vllaznia – Teuta 0-2
Vora – Skënderbeu 1-1
Dinamo City – Laçi 3-1
Tirana – Elbasani 2-2
Egnatia – Partizani 2-1
Pas pesë javësh, Teuta kryeson me 13 pikë, ndërsa Egnatia dhe Dinamo City e ndjekin me nga 12.
Rreth autorit
