Qeveria izraelite miratoi sot marrëveshjen e armëpushimit me Hamasin, që parashikon ndalimin e luftimeve në Gaza brenda 24 orësh dhe lirimin e pengjeve izraelite brenda 72 orësh nga hyrja në fuqi e marrëveshjes.
Plani, i ndërmjetësuar nga SHBA në kuadër të një nisme 20-pikëshe të Presidentit Donald Trump, përfshin shkëmbimin e pengjeve me të burgosur palestinezë dhe një tërheqje graduale të forcave izraelite nga Gaza. Trump pritet të udhëtojë në Egjipt të dielën për një ceremoni të mundshme nënshkrimi.
Sipas marrëveshjes, SHBA do të dislokojë rreth 200 trupa në Lindjen e Mesme për koordinimin e një force shumëkombëshe që do të mbikëqyrë zbatimin e armëpushimit, pa praninë e trupave amerikane në Gaza.
Pas hyrjes në fuqi të marrëveshjes, ndihma humanitare do të nisë të hyjë në territor për qindra mijëra civilë të zhvendosur. Lëvizja është përshëndetur nga vendet perëndimore dhe arabe dhe shihet si një sukses diplomatik për Trump.
Që nga tetori 2023, konflikti ka lënë mbi 67 mijë palestinezë të vrarë dhe 1.200 izraelitë të rënë në sulmin fillestar të Hamasit. Rreth 20 pengje izraelite besohet se janë ende gjallë në Gaza.
