Nga 1 nëntori, taksitë elektrike do të paguajnë më shumë për karikimin e mjeteve. Enti Rregullator i Energjisë ka vendosur që çmimi për stacionet me fuqi mbi 11 kWh të rritet nga 14 në 22 lekë për kilovat-orë.
Në orët e pikut, kryesisht në mbrëmje, tarifa do të jetë edhe më e lartë. Vendimi ka shkaktuar reagim nga Shoqata e Taksive, e cila kërkon anulimin e tij.
“Kjo rritje është bërë pa konsultim me grupet e interesit. Vetëm në Tiranë, 60% e taksive janë elektrike. Do të preken të ardhurat e drejtuesve, sepse çmimi për klientët mbetet i pandryshuar,” tha Xhevit Bara nga Sindikata Shqiptare e Taksive, duke paralajmëruar grevë nëse vendimi nuk tërhiqet.
Ekspertët, megjithatë, e konsiderojnë ndryshimin të justifikuar. “Nuk është normale që kompanitë e taksive të paguajnë energjinë me të njëjtin çmim si familjarët. Ky rishikim ishte i domosdoshëm,” tha inxhinieri Azmer Duleviç.
Sipas Entit Rregullator të Energjisë, gjatë vitit 2025 është shënuar një rritje e ndjeshme e konsumit të energjisë për karikim të automjeteve elektrike.
