Kryeministri në detyrë i Kosovës, Albin Kurti, tha se nuk e sheh të arsyeshme mbajtjen e zgjedhjeve të reja parlamentare, duke sugjeruar që vendi të vazhdojë me një “qeveri Kurti 2.5” deri në fund të vitit, ose me një “qeveri Glauk Konjufca 1” deri në prill.
“Ne nuk mendojmë se është punë e mençur të shkojmë në zgjedhje në dhjetor e sërish në prill,” deklaroi Kurti të hënën, pas një vizite në Institutin e Krimeve të Kryera gjatë Luftës në Kosovë. Ai shtoi se deputetët duhet të zgjedhin midis dy opsioneve, pasi “pa njërën prej tyre, qeverisja nuk është e mundur.”
Deklarata vjen një ditë pas raundit të dytë të zgjedhjeve lokale dhe një javë pas vendimit të presidente Vjosa Osmani për të mandatuar kryetarin e Kuvendit, Glauk Konjufca, si kandidatin e dytë për kryeministër nga Lëvizja Vetëvendosje.
