Presidenti i Këshillit Evropian, Antonio Costa, deklaroi pas samitit BE–Ballkani Perëndimor në Bruksel se zgjerimi mbetet thelbësor për sigurinë dhe besueshmërinë e Evropës. Ai theksoi se procesi është i bazuar në meritë dhe se vendet që ecin më shpejt “nuk duhet të frenohen”.
Costa përmendi progresin e një viti: Mali i Zi ka mbyllur pesë kapituj, Shqipëria ka hapur të gjithë kapitujt negociues, Maqedonia e Veriut ka forcuar lidhshmërinë rajonale, Bosnja e Hercegovina ka miratuar Agjendën e Reformave dhe Kosova ka ndërmarrë hapa për ndërtimin e besimit ndërkomunitar.
Ai përsëriti se BE-ja mbetet partneri më i besueshëm i rajonit dhe se të gjitha vendet e Ballkanit Perëndimor janë pjesë e familjes evropiane. Samiti i radhës do të mbahet në Mal të Zi në qershor 2026.
