Kryeministri Edi Rama reagoi sërish ndaj protestave para Kryeministrisë, duke publikuar një mesazh ironik për kërkesën që ai të dorëhiqet.
Në një postim në rrjetet sociale, Rama ndau mesazhin e një qytetari anonim, i cili i kërkon dorëheqjen, por duke renditur si arsye disa nga ato që qeveria i paraqet si arritje.
Në mesazh përmenden transformimet urbane dhe rurale, aeroportet, turizmi, rritja e pagave, hapja e negociatave me Bashkimin Evropian dhe pozicioni ndërkombëtar i Shqipërisë.
Qytetari shkruan gjithashtu se qeverisja vuan nga “fodullëku” dhe nga ajo që ai e quan “shkenca e gjithologjisë”.
Rama e shoqëroi postimin me komentin se e mirëkupton dhe e pranon “përulësisht” kërkesën për dorëheqje.
Në fund të mesazhit thuhet: “Dorëhiqu… në 2030”.
Reagimi vjen ndërsa protestat para Kryeministrisë vijojnë prej 26 ditësh.
Protestuesit kanë kërkuar dorëheqjen e Ramës, krijimin e një qeverie teknike dhe anulimin e disa ndryshimeve ligjore që lidhen me zonat e mbrojtura, trashëgiminë kulturore dhe investimet strategjike.
About the Author
