TIRANË, 28 tetor — Paketa fiskale e propozuar për vitin 2027 mund t’i shtojë rreth 14 miliardë lekë, ose afërsisht 150 milionë euro, të ardhurat vjetore të buxhetit. Përllogaritja është bërë nga revista Monitor, bazuar në relacionet e projektligjeve të Ministrisë së Financave.
Projektet parashikojnë rritjen e tatimit mbi fitimin nga 15% në 17% dhe të tatimit mbi dividendin nga 8% në 15%. Vetëm këto dy ndryshime vlerësohet t’u kushtojnë bizneseve rreth 85 milionë euro në vit.
Një tjetër ndryshim është ulja e pragut të regjistrimit të detyrueshëm për TVSH-në nga 10 milionë në 5 milionë lekë xhiro vjetore. Sipas relacionit, rreth 17,500 tatimpagues të tjerë mund të përfshihen në skemë.
Drafti parashikon TVSH 6% për një grup ushqimesh bazë, ndërsa norma standarde do të rritet nga 20% në 21%. Për kategori të caktuara të turizmit propozohet rritje nga 6% në 10%.
Ndryshimet nuk janë miratuar ende. Zbatimi i tyre parashikohet nga janari 2027, nëse projektligjet përfundojnë procedurat e nevojshme.
Rreth autorit
