Paga mesatare bruto në Shqipëri arriti në 82,210 lekë në tremujorin e parë të vitit 2025, duke shënuar një rritje vjetore prej 11.6 për qind krahasuar me të njëjtën periudhë të një viti më parë. Të dhënat u publikuan nga Instituti i Statistikave.
Megjithatë, krahasuar me tremujorin e fundit të vitit 2024, vërehet një rënie prej 1.43 për qind, kur paga mesatare ishte 83,401 lekë.
Sektorët me pagat më të larta mbeten ata të financave dhe sigurimeve, si dhe informacionit dhe komunikimit – sektorë që tradicionalisht përfitojnë nga kërkesa e lartë për aftësi të specializuara dhe ndikimi i teknologjisë.
Administrata publike, arsimi, shëndetësia dhe shërbimet sociale përjetuan rritjen më të madhe të pagave, me një mesatare prej 16.7 për qind, në përputhje me premtimet e qeverisë për rritje të kompensimit në sektorin publik.
Qeveria ka paralajmëruar se brenda kësaj dekade synon që paga mesatare në vend të arrijë në nivelin e 1,000 eurove, ndërsa paga minimale të shkojë në 500 euro.
Rreth autorit
