Kriza institucionale në Kosovë thellohet edhe më tej, pasi Kuvendi i dalë nga zgjedhjet e 9 shkurtit nuk arriti të konstituohet as në përpjekjen e 43-të radhazi. Seanca e sotme u ndërpre pas tensioneve mes shumicës dhe opozitës, me kryesuesin Avni Dehari që urdhëroi ndërprerjen e fjalës për tre deputetë opozitarë.
Bllokimi vazhdon për shkak të mungesës së shumicës së nevojshme për zgjedhjen e kryetarit të Kuvendit. Vetëvendosje, në koalicion me Guxo dhe Alternativa, nuk ka siguruar votat për Albulena Haxhiun. Situata vjen në kundërshtim me vendimin e Gjykatës Kushtetuese që i obligon institucionet ta finalizojnë konstituimin deri më 26 korrik.
Në sfond, ka akuza për kalkulime politike nga ana e qeverisë Kurti dhe një heshtje institucionale nga Presidentja Vjosa Osmani, e cila kritikohet për qëndrim pasiv. Analistë dhe përfaqësues të shoqërisë civile po kërkojnë ndërgjegjësim qytetar dhe presion publik për zgjidhjen e krizës.
Rreth autorit
