Shkodër, 9 korrik — Kapiteni i një anijeje turistike në liqenin e Shkodrës, Arben Anamali, 51 vjeç, humbi jetën pasditen e djeshme teksa tentoi të shpëtonte dy turistë nga mbytja. Dy turistët u shpëtuan dhe janë në gjendje të mirë shëndetësore, por kapiteni nuk mundi të dilte më nga uji.
Kërkimet për gjetjen e trupit të Anamali vazhdojnë prej mesditës së djeshme. Forcat polumbare të FNSH-së, në bashkëpunim me punonjës të Bashkisë Shkodër, janë të angazhuara në terren edhe sot.
Kreu i Bashkisë së Shkodrës, Benet Beci, reagoi përmes një postimi në Facebook duke e cilësuar ngjarjen si tragjike dhe duke shprehur mbështetjen për familjen e kapitenit. “Kapiteni që sakrifikoi jetën për të shpëtuar turistët u kthye në një tragjedi për familjen dhe për të gjithë ata që e njohën,” shkroi Beci.
Autoritetet nuk kanë dhënë ende informacion për vendndodhjen e trupit. Kërkimet pritet të vazhdojnë deri në identifikimin dhe rikuperimin e viktimës.
