Shkodër, 10 korrik — Pas 48 orësh kërkime, polumbarët gjetën në orët e para të mëngjesit trupin e pajetë të kapitenit Arben Anamali, i cili u mbyt në liqenin e Shkodrës më 8 korrik, pasi shpëtoi dy turistë nga rreziku i mbytjes.
Anamali, 51 vjeç, drejtonte anijen turistike “Drini”, në pronësi të Bashkisë Shkodër. Gjatë një lundrimi, disa turistë kërkuan të laheshin në liqen pavarësisht kushteve të vështira. Kur dallgët i larguan nga anija, kapiteni ndërhyri me kamerdare dhe më pas u hodh vetë në ujë. Shpëtoi të dy turistët, por nuk arriti të kthehej më në bord.
Presidenti Bajram Begaj e quajti Anamalin “shpirt heroik” dhe “model shoqëror”, ndërsa reagimet e shumta publike e kanë vlerësuar si simbol të humanizmit dhe guximit.
Arben Anamali ishte kapiten i licensuar pranë Bashkisë Shkodër dhe baba i dy fëmijëve.
