Euroja pësoi të hënën rënien më të madhe ditore ndaj dollarit që nga muaji maj, pasi Gjermania dhe Franca shprehën hapur shqetësimet për marrëveshjen e re tregtare mes BE-së dhe SHBA-së. Monedha e përbashkët u dobësua me mbi 1% kundrejt dollarit dhe 0.8% ndaj paundit, pas njoftimit se SHBA do të vendosë tarifa 15% mbi shumicën e importeve nga BE-ja.
Ursula von der Leyen e ka cilësuar këtë marrëveshje si “më të madhen tregtare ndonjëherë”, duke theksuar se ajo mbulon rreth 44% të PBB-së globale. Por kancelari gjerman Friedrich Merz paralajmëroi se tarifat e reja mund të shkaktojnë “dëme të konsiderueshme” jo vetëm për ekonominë gjermane, por edhe për të gjithë Eurozonën.
Nga ana tjetër, kryeministri francez François Bayrou e quajti marrëveshjen një “ditë të errët”, duke theksuar se BE-ja është “përkulur para presioneve amerikane”.
Bursat evropiane reaguan menjëherë, me indeksin DAX të Gjermanisë që ra me 1.1%, ndërsa CAC 40 i Francës humbi 0.4%. Aksionet e industrisë automobilistike, më të ndjeshme ndaj tarifave, ranë me 1.8% në indeksin Stoxx Europe 600.
Pavarësisht kësaj, euroja vazhdon të jetë 12% më e fortë kundrejt dollarit që nga fillimi i vitit, e ndihmuar nga politikat e reja fiskale në Gjermani dhe pritshmëritë se masat ekonomike të SHBA-së do të nxisin kërkesën në Eurozonë.
Ndërkohë, Donald Trump paralajmëroi tarifa të tjera, deri në 20%, për vendet që nuk arrijnë marrëveshje tregtare të drejtpërdrejta me SHBA-në. “Ky është vetëm fillimi,” deklaroi ai nga Skocia.
