Policia e Shtetit, në bashkëpunim me Policinë Bashkiake të Shkodrës, ka vijuar aksionin për lirimin e hapësirave publike në plazhin e Velipojës, duke synuar garantimin e një sezoni turistik të rregullt dhe të sigurt për pushuesit.
Në njoftimin e bërë publik, u bë e ditur se gjatë kontrolleve në vijën bregdetare është konstatuar një tjetër rast i zënies së hapësirës publike me shezlongë të vendosur pa miratimin e Agjencisë Kombëtare të Bregdetit. Policia ka ndërhyrë duke liruar zonën dhe duke sekuestruar pajisjet e vendosura në kundërshtim me ligjin.
Kryeministri Edi Rama ka publikuar pamje nga aksioni i forcave policore, duke theksuar se në Velipojë “është përditë e lartë gatishmëria për të garantuar hapësirat publike e një sezon turistik sa më të sigurt e të rregullt në çdo cep të bregdetit tonë”.
Aksione të ngjashme janë zhvilluar edhe në zona të tjera bregdetare gjatë sezonit veror, me qëllim frenimin e rasteve të zënies së hapësirave publike dhe rritjen e standardeve të shërbimeve turistike.
