Departamenti Amerikan i Shtetit (DASH) ka propozuar një program testues 12-mujor, sipas të cilit aplikantëve për viza turistike dhe biznesi mund t’u kërkohet një garanci financiare nga 5.000 deri në 15.000 dollarë.
Programi do të aplikohet për shtetas nga vende që kanë nivel të lartë të qëndrimeve të paligjshme pas skadimit të vizës dhe probleme me kontrollin e dokumenteve. Qëllimi është të frenohet qëndrimi i paligjshëm në SHBA pas hyrjes me vizë.
Garancia do të shërbejë si masë shtesë për të siguruar kthimin e aplikantit në vendin e origjinës. Programi nuk do të zbatohet për vendet që janë pjesë e Visa Waiver Program dhe përjashtime mund të bëhen në raste individuale.
Programi pritet të hyjë në fuqi brenda 15 ditësh nga publikimi zyrtar. Lista e vendeve të përfshira do të bëhet publike në atë kohë.
