Komisioni Qendror i Zgjedhjeve në Kosovë vendosi të rinumërojë të gjitha votat në 28 komuna, pasi rinumërimi i pjesshëm zbuloi mospërputhje të mëdha në votat për kandidatët për deputetë në zgjedhjet parlamentare të 28 dhjetorit 2025.
Kryetari i KQZ-së, Kreshnik Radoniçi, tha se dallimet në votat për partitë janë minimale, por se te kandidatët është konstatuar “shkallë e lartë pasaktësie”. Në Prizren, që u cilësua si rasti më ekstrem, mbi 20 mijë vota u janë zbritur kandidatëve pas rinumërimit.
KQZ vendosi gjithashtu shkarkimin e përfaqësuesve politikë në Komisionin Komunal Zgjedhor në Prizren. Fillimisht ishte planifikuar rinumërim i pjesshëm në disa komuna, por vendimi u zgjerua pas kërkesave të partive dhe shoqërisë civile.
Prokurori i Shtetit ka nisur veprimet hetimore dhe ka kërkuar mbledhjen e provave për vepra penale të lidhura me procesin zgjedhor. Rinumërimi pritet të vonojë konstituimin e Kuvendit të ri dhe formimin e qeverisë.
Sipas rezultateve preliminare, Lëvizja Vetëvendosje kryeson zgjedhjet me mbi 51% të votave.
Rreth autorit
