Shpenzimet e shtetit për funksionim dhe mirëmbajtje kanë kaluar investimet publike në katër muajt e parë të vitit 2026, sipas të dhënave të Ministrisë së Financave.
Në periudhën janar-prill, shpenzimet operative dhe të mirëmbajtjes arritën në 17.7 miliardë lekë.
Në të njëjtën periudhë, investimet publike ishin 14.8 miliardë lekë, ose 16.5% më të ulëta.
Kjo do të thotë se buxheti ka shpenzuar më shumë për të mbajtur në punë strukturat ekzistuese sesa për projekte të reja në rrugë, shkolla, spitale apo infrastrukturë tjetër.
Tendenca kishte nisur edhe në vitin 2025 dhe shihet si problem për një vend si Shqipëria, ku nevojat për investime në transport dhe infrastrukturë mbeten të mëdha.
Ekspertë të sektorit thonë se shpenzimet kapitale kanë ndikim më të drejtpërdrejtë në ekonomi, sepse krijojnë vende pune, rrisin produktivitetin dhe mbështesin zhvillimin afatgjatë.
Ndërkohë, zëri “shpenzime operative dhe mirëmbajtje” përfshin një gamë të gjerë kostosh: energji, ujë, karburant, qira, pajisje zyrash, shërbime konsulence, IT, mirëmbajtje rrugësh dhe pagesa të kontratave koncesionare apo PPP.
Sipas Monitor, një pjesë e këtyre shpenzimeve lidhet edhe me kontrata mirëmbajtjeje të sistemeve digjitale dhe serverëve shtetërorë, disa prej të cilave janë nën hetim nga SPAK.
Në sektorin rrugor, problemi shihet më qartë. Disa akse të rëndësishme, përfshirë segmente të ndërtuara vitet e fundit, kanë shfaqur dëmtime, ndërsa mirëmbajtja mbetet e fragmentuar në tenderë të vegjël dhe ndërhyrje të pjesshme.
Shembujt përfshijnë probleme në Rrugën e Kombit, segmentin Kukës-Morinë dhe autostradën Tiranë-Durrës, ku janë kryer shpenzime të përsëritura për ndërhyrje të ndryshme.
Të dhënat ngrenë pikëpyetje mbi mënyrën si po përdoren paratë publike: për zhvillim të ri apo kryesisht për mbajtjen në këmbë të sistemit ekzistues.
About the Author
