Turizmi në Shqipëri vijon të përqendrohet fort në muajt e verës, me korrikun dhe gushtin që përbëjnë 42.4% të të gjitha net-qëndrimeve turistike në vitin 2025.
Sipas të dhënave të Eurostat, Shqipëria renditet mes vendeve europiane me sezonalitet të lartë në sektorin e akomodimit turistik.
Në këtë grup përfshihen edhe Kroacia, Bullgaria, Greqia dhe Mali i Zi.
Kroacia mban nivelin më të lartë të sezonalitetit, me rreth 55% të net-qëndrimeve gjatë muajve të verës.
Në Shqipëri, strukturat akomoduese regjistruan rreth 9.7 milionë net-qëndrime gjatë vitit 2025.
Gushti ishte muaji më i ngarkuar, me 23.4% të totalit vjetor.
Korriku përbënte 19%, ndërsa qershori dhe shtatori kishin përkatësisht 12.4% dhe 12.3%.
Kjo do të thotë se katër muajt nga qershori në shtator përbëjnë rreth 70% të gjithë aktivitetit vjetor në akomodim.
Në dimër, aktiviteti bie ndjeshëm.
Janari dhe shkurti së bashku përbënin vetëm 4.7% të net-qëndrimeve vjetore.
Në gusht u regjistruan rreth 2.26 milionë net-qëndrime, kundrejt rreth 226 mijë në shkurt.
Kjo tregon se fluksi i gushtit ishte rreth 10 herë më i lartë se ai i shkurtit.
Përqendrimi i lartë në verë sjell mbingarkesë për destinacionet turistike, infrastrukturën dhe shërbimet gjatë sezonit.
Në muajt e tjerë, ai lë kapacitete të pashfrytëzuara dhe e bën punësimin në sektor më të paqëndrueshëm.
Rreth autorit
