Partia Demokratike ka njoftuar protestë kombëtare të enjten, më 8 tetor, në ditën kur Kuvendi pritet të votojë projektligjin për reformën administrativo-territoriale. Sipas njoftimit të raportuar nga Politiko, protesta është paralajmëruar për në orën 10:00, paralelisht me seancën plenare.
Drafti i Partisë Socialiste, i miratuar në Komisionin për Çështjet Ligjore më 5 tetor, parashikon shkrirjen e 15 bashkive dhe bashkimin e tyre me njësitë vendore më të mëdha fqinje. Me propozimin e ri, numri i bashkive do të ulet nga 61 në 46.
Ndryshimet janë kundërshtuar nga opozita dhe komunitetet e prekura. Më 5 tetor, banorë të Poliçanit protestuan para Kuvendit kundër bashkimit të bashkisë së tyre me Beratin. Banorë nga Memaliaj kanë kundërshtuar gjithashtu planin për bashkimin e bashkisë me Tepelenën.
PD u ka bërë thirrje anëtarëve të saj dhe qytetarëve të tjerë të marrin pjesë në tubim për të kundërshtuar hartën e propozuar. Votimi në seancë plenare është parashikuar më 8 tetor.
Rreth autorit
