Ish-nënkryetari i Këshillit të Lartë të Drejtësisë, Kreshnik Spahiu, rikujtoi përplasjet e tij me qeverinë e kohës, gjatë një interviste në emisionin Top Story, duke e cilësuar denoncimin e ndryshimit të kombësisë në gjykatat shqiptare si momentin që i kushtoi karrierën institucionale.
“Ishte një skandal gjyqësor dhe kushtetues që njerëzve u ndryshohej kombësia me një vërtetim nga kisha. Kjo nuk ndodh në asnjë shtet të botës,” u shpreh Spahiu, duke nënvizuar se ndonëse përballja me qeverinë i kushtoi pozicionin në KLD, ajo i dha një emër të fortë publik.
Spahiu u shqua në vitet 2007–2012 për një qasje kritike ndaj gjyqtarëve të korruptuar dhe përballjen e hapur me mazhorancën, duke kulmuar me dorëheqjen e tij nga KLD në vitin 2012. Ai më pas drejtoi Aleancën Kuq e Zi, një lëvizje me mesazh kombëtarist, që nuk arriti të sigurojë përfaqësim parlamentar në zgjedhjet e 2013-ës.
Pas tërheqjes nga politika aktive, Spahiu mbetet një zë publik përmes analizave mediatike dhe publicistikës, shpeshherë si kritik i elitës politike aktuale.
Rreth autorit
