Bruksel/Tiranë, 9 korrik — Komisioni Europian ka publikuar raportin përfundimtar mbi sundimin e ligjit në Shqipëri, duke njohur progresin e bërë në konsolidimin e drejtësisë, forcimin e institucioneve dhe luftën kundër korrupsionit. Dokumenti i zyrtarizuar mbetet i pandryshuar krahasuar me draftin konfidencial të ndarë më herët me autoritetet shqiptare.
Komisioni vlerëson miratimin e Strategjisë Kundër Korrupsionit 2024–2030 dhe thekson se kuadri ligjor ekzistues për luftën kundër korrupsionit është i qëndrueshëm. Ai inkurajon përfundimin e legjislacionit për masat parandaluese dhe mbështet vijimësinë e angazhimit institucional.
Raporti njeh rolin që ka luajtur SPAK në konsolidimin e rezultateve në luftën kundër korrupsionit të nivelit të lartë, duke nënvizuar rëndësinë e mbështetjes me burime të mjaftueshme për të përballuar misionin e tij. Komisioni përshëndet gjithashtu rolin në rritje të Agjencisë së Mbikëqyrjes së Policisë, e cila ka rritur ndjeshëm referimet për ndjekje penale.
Gjykata Kushtetuese është vlerësuar për funksionimin e saj efektiv, ndërsa raporti i bën thirrje Kuvendit të respektojë plotësisht vendimet e saj, për të garantuar siguri ligjore dhe funksionim institucional të qëndrueshëm.
Komisioni nxit transparencë dhe përfshirje më të gjerë në punën e Komitetit për Mirëqeverisjen, si dhe përafrim me strukturat e procesit të integrimit. Ai thekson se suksesi i reformës në drejtësi duhet të mbështetet me mekanizma gjithëpërfshirës dhe bashkërendues.
Në përfundim, Komisioni Europian e konsideron Shqipërinë të përkushtuar ndaj objektivave të integrimit dhe e nxit të ruajë ritmin e reformave, duke e parë forcimin e sundimit të ligjit si çelës për ecurinë drejt anëtarësimit në BE.
Rreth autorit
