Kryeministri i Maqedonisë së Veriut, Hristijan Mickoski, u tërhoq të dielën nga deklarata për vendosjen e një takse ndaj beqarëve, duke thënë se është “keqkuptuar” dhe kërkoi ndjesë për çdo shqetësim të shkaktuar.
Reagimi vjen pas debatit publik të nxitur nga komenti i tij i së premtes, gjatë një forumi mbi sfidat demografike, ku ai tha se po shqyrtohej futja e një takse shtesë për të pamartuarit. “Nuk do të ketë kurrfarë taksash,” tha Mickoski, duke shtuar se qëllimi i tij ishte të tërhiqte vëmendjen te rënia e lindshmërisë dhe numrit të martesave në vend.
Sipas tij, në vitin 2016 u regjistruan 23 mijë lindje, ndërsa në vitin 2024 vetëm 16 mijë – një rënie prej 30 për qind. Po ashtu, numri i martesave ka rënë me 17 për qind gjatë tri viteve të fundit.
Deklarata fillestare u kritikua ashpër nga organizatat për të drejtat e njeriut dhe opozita, që kërkuan politika mbështetëse për të rinjtë dhe emigrantët, jo penalizuese. Mickoski theksoi se qeveria synon politika që nxisin lindshmërinë dhe rikthejnë besimin në të ardhmen.
Rreth autorit
